Հոկտեմբերի 12-ին “Մոսկվա” կինոթատրոնի կարմիր դահլիճում կայացավ Մանկապատանեկան ֆիլմերի 6-րդ միջազգային փառատոնի բացումը, որից առաջ Շառլ Ազնավուրի հրապարակում հավաքվել էին փառատոնի հյուրերը, հանդիսականներն ու մասնակցում համերգային ծրագրին, որտեղ հանդես եկան Ալլա Լեւոնյանը, Հայկ Պետրոսյանը եւ տարբեր պարային խմբեր:

Համերգային ծրագրին հաջորդեց փառատոնի բացումը, որին ներկա էին ինչպես հայ, այնպես էլ արտերկրից ժամանած կինոմատոգրաֆիայի, մուլտիպլիկացիայի արվեստի անվանի գործիչներ: Հյուրերի թվում էին «Երալաշ» մանկապատանեկան հանդեսի հեղինակ Բորիս Գրաչեւսկին, աշխարհահռչակ ռեժիսոր, անիմատոր Հարի Բարդինը: Փառատոնի ընթացքում կներկայացվի 81 ֆիլմ 27 երկրներից, որոնք կգնահատվեն նաեւ պրոֆեսիոնալ ժյուրիի կողմից: Բացման սկզբում ներկայացվեց մասնակիցների ցանկը. փառատոնին իրենց մասնակցությունն են բերել ֆիլմեր Ռուսաստանից, Լեհաստանից, Գերմանիայից, Նիդեռլանդներից, Հնդկաստանից, ԱՄՆ-ից, Իտալիայից, Թուրքիայից, Բելառուսից եւ այլ երկրներից:

Մանկապատանեկան ֆիլմերի 6-րդ միջազգային փառատոնի շրջանակում Հայաստան է այցելել բժշկական գիտությունների դոկտոր, պրոֆեսոր, ուռուցքաբան, ՌԴ մանկական հեմատոլոգիայի, ուռուցքաբանության և իմունոլոգիայի գիտական կենտրոնի փոխտնօրեն Ալեքսեյ Մասչանը:

«Դու մենակ չես…միասին կհաղթենք» անվճար ակցիայի շրջանակներում այսօր Երևանի Մուրացան քիմիոթերապիայի կլինիկայում 7 հիվանդ երեխա բուժզննում է անցել պրոֆեսորի մոտ:

«Նրանցից երկուսի վիճակը բավականին ծանր է: Նրանցից մեկին մենք առաջարկել ենք բուժում ստանալու համար գալ Մոսկվա, իհարկե, ամբողջ ծախսերը մենք վերցնում ենք մեզ վրա: Մենք ունենք այդ հնարավորությունը»,- այս մասին ասուլիսում ասաց Ալեքսեյ Մասչանը:

Մանկապատանեկան ֆիլմերի 6-րդ միջազգային փառատոնը տարեցտարի ընդլայնում է թե իր աշխարհագրությունը, թե ֆիլմերի որակը:

Փառատոնին շուրջ800 ֆիլմի հայտ է ներկայացվել, որից ընտրվել 81-ը 27 երկրից: Հայաստանը կներկայանա երեք ֆիլմով: Այս մասին ասաց փառատոնի կազմակերպիչ «Ռոլան Բիկով» հիմնադրամի նախագահ Նունե Մանուկյանը:

Նա նշեց այն չափանիշները, որոնք պարտադիր են փառատոնին մասնակցելու համար. «Ֆիլմերը պետք Է նկարահանված լինեն վերջին 2-3 տարում: Ամենակարևորը դրանց գաղափարն է, թե ինչ հաղորդագրություն կա դրանցում` ուղղված երեխաներին, և թե ինչքանով են դրանք վեր հանում նրանց պրոբլեմները ամբողջ աշխարհում»: