2013թ. նոյեմբերի 1-5-ը Երևանում և 30 օր ՀՀ մարզերում տեղի կունենա Մանկապատանեկան ֆիլմերի 9-րդ միջազգային փառատոնը, որը կազմակերպել է Հայաստանի «Ռոլան Բիկով» հիմնադրամը` ՀՀ նախագահի, ՀՀ մշակույթի նախարարության և Երևանի քաղաքապետարանի աջակցությամբ: Այս մասին այսօր լրագրողների հետ հանդիպման ժամանակ ասաց «Ռոլան Բիկով» հիմնադրամի նախագահ Նունե Մանուկյանը:  Նա նաև խոսեց այն փոփոխությունների, նորամուծությունների մասին, որոնցով կտարբերվի այս տարվա փառատոնը նախորդ տարիներին անցկացվածներից. «Փոփոխության է ենթարկվել մանկապատանեկան ժյուրիի ձևաչափը, որտեղ այս տարի աշխատելու և փառատոնի անմիջական մասնակիցն են դառնալու Լոռու մարզի Ալավերդի, Շնող, Թեղուտ և Շահումյան համայնքների երեխաները, Գյումրիի «Թռչունյան տուն» մանկատան, «Հույսի կամուրջ» հասարակական կազմակերպության սաները, «ԹՈՒՄՈ» ստեղծարար տեխնոլոգիաների կենտրոնի երեխաները, Սիամանթոյի անվան թիվ 162 դպրոցի և «Երևակ» կրթահամալիրի աշակերտները»,- ասաց Ն. Մանուկյանը:

Փառատոնի գեղարվեստական ղեկավար Նելլի Ալելովան էլ հայտնեց, որ ընդլայնվել է մրցութային անվանակարգերի շարքը` համալրվելով Հայաստանի «Ռոլան Բիկով» հիմնադրամի կողմից ստեղծված երեք նոր անվանակարգերով` «Պատիվ ունեմ», «Սպորտն իմ ընտրությունն է» և «Երաժշտական ֆիլմեր»: Խոսելով նոր անվանակարգերի մասին` նա մասնավորապես ասաց. «Պատիվ ունեմ»-ը հայրենասիրական ֆիլմերի անվանակարգ է, որն ստեղծվել է` կինոյի միջոցով նպաստելու զինվորների գաղափարական դաստիարակությանը, բանակի մարտական ոգու բարձրացմանը: Փառատոնային լավագույն ֆիլմերը գալիք տարվա ընթացքում կցուցադրվեն հանրապետության բոլոր մարզերում տեղակայված զորամասերում: «Սպորտն իմ ընտրությունն է» սպորտային ֆիլմերի անվանակարգ է, որն ստեղծվել է` կինոյի միջոցով խթանելու մասսայական սպորտի դերն ու նշանակությունը հայ երեխաների և երիտասարդության շրջանում, շեշտելու սպորտի և առողջ ապրելակերպի անհրաժեշտությունը: Իսկ «Երաժշտական ֆիլմեր» անվանակարգն ստեղծվել է, որովհետև վերջին տարիներին երաժշտական ֆիլմեր շատ հազվադեպ են նկարահանվում, մինչդեռ, կարծում եմ, դրանց անհրաժեշտությունը կա»: Նշենք, որ փառատոնի ծրագրում ընդգրկվել է 113 ֆիլմ 34 երկրներից: Նունե Մանուկյանի փոխանցմամբ` Մանկապատանեկան ֆիլմերի 9-րդ միջազգային փառատոնի շրջանակներում նախատեսվում են փառատոնի բացման և փակման արարողություններ, կինոդիտումներ, պրեմիերաներ, ստեղծագործական հանդիպումներ, վարպետության դասեր, հանդիպումներ բուհերում, հանրակրթական ու արվեստի դպրոցներում, ցուցահանդեսներ, ինչպես նաև մշակութային, կրթական ու սոցիալական մի շարք ծրագրեր:

ՀԱՅՐԱՊԵՏՅԱՆ Սիրանուշ

http://www.aravot.am/2013/10/29/400554/