Երեկ մեկնարկած մանկապատանեկան ֆիլմերի հինգերորդ միջազգային փառատոնն այսօր արդեն սկսել է ֆիլմերի ցուցադրությունները: «Նաիրի» կինոթտրոնում ցուցադրվել է 8-15 տարեկան երեխաների համար երեք ֆիլմ` ռուս ռեժիսոր Գեորգի Գիտիսի «Ալյոնուշկայի և Երյոմայի արկածները», լատվիացի ռեժիսոր Ունա Սելմանի «Էլվիսին փնտրելիս» և գերմանացի ռեժիսոր Մարտին Բուսկերի «Ամերիկյան բլուրներ»: Այժմ ցուցադրվում է Ուկրաինայից ռեժիսոր Ռոման Շիրմանի «Հիասքանչ հեքիաթ» ֆիլմը: Հիշեցնենք, որ փառատոնի բացման հանդիսավոր արարողությունը տեղի է ունեցել երեկ: Երևանի Շառլ Ազնավուրի անվան հրապարակում մուլտֆիլմերի հայտնի հերոսների մասնակցությամբ պարային շքերթի ընթացքում երեխաներին հնարավորություն տրվեց նկարահանվելու Վինի Թուխի, Կարմիր գլխարկի, Գայլի, Միկի մկնիկի ու այլ մուլտհերոսների հետ:

Տեղեկացնենք նաև, որ փառատոնի մասնակիցներին ողջույնի խոսք են հղել ՀՀ նախագահ Սերժ Սարգսյանը, ՀՀ վարչապետ Տիգրան Սարգսյանն ու ՀՀ մշակույթի նախարար Հասմիկ Պողոսյանը, իսկ ՀՀ վաստակավոր արտիստ Սոս Սարգսյանը, տեսնայութի միջոցով դիմելով փառատոնի մասնակիցներին ու հյուրերին, դրական է գնահատել այն փաստը, որ նմանատիպ փառատոն կա և այն արդեն 5 տարեկան է:

Հարկ է նշել, որ այսօր փառատոնի շրջանակներում հատուկ իրադարձություն է տեղի ունենալու: Հայ հանդիսատեսի դատին ներկայացվելու է «Երալաշ» մանկական կինոամսագրի գեղարվեստական ղեկավար, արվեստի վաստակավոր գործիչ, ռեժիսոր Բորիս Գրաչևսկու «Տանիք» ֆիլմը, որի պրեմիերան տեղի կունենա Երևանի «Մոսկվա» կինոթատրոնում:

«Տանիք» ֆիլմի իրադարձությունների կենտրոնում երեք դեռահաս աղջիկներ են, որոնց ծնողները խիստ զբաղված են իրենց խնդիրներով և գրեթե չեն նկատում, թե ինչ է կատարվում իրենց երեխաների հետ: Եվ ահա մի օր, մեծերի կողմից հասկացված չլինելու արդյունքում, աղջիկները հայտնվում են տանիքի եզրին…

16.10.2009, 18:41 Aysor.am